image image image image
Grand Opening GBKP Runggun Cikarang GBKP Cikarang yang telah disyahkan menjadi Jemaat/Runggun pada sidang GBKP klasis Jakarta-Bandung tanggal 10-12 Oktober 2014 di Hotel Rudian-Puncak,
PEMBINAAN BP RUNGGUN – RAMAH TAMAH TAHUN BARU – PENCANANGAN TAHUN PENINGKATAN SOSIAL EKONOMI DAN BUDAYA JEMAAT Pada tanggal 10 Januari 2015 di GBKP Runggun Bekasi telah di laksanakan kegiatan Pembinaan BP Runggun di Klasis Jakarta-Bandung. Kegiatan yang dimulai pukul 08.00 Wib diawali kebaktian pembukaan oleh Pdt. Alexander Simanungkalit,
WISATA LANSIA GBKP KLASIS JAKARTA-BANDUNG KE BANGKOK-PATTAYA Wisata Lansia yang menjadi salah satu program Bidang Diakoni GBKP Klasis Jakarta-Bandung telah dilaksanakan tanggal 8-11 Desember 2014 ke Bangkok-Pattaya. Wisata yang diikuti 47 peserta ini di damping Kabid Diakonia, Dk. Ferdinand M. Sinuhaji dan Pdt.S.Brahmana.
PEMBUKAAN SIDANG KERJA SINODE (SKS) DAN SIDANG PROGRAM & KEUANGAN (SPK) TAHUN 2014 Pembukaan Sidang Kerja Sinode (SKS) dan Sidang Program dan Keuangan (SPK) tanggal 22-25 Oktober 2014 telah dilaksanakan pada pukul 10.00 Wib, di dahului kebaktian pembukaan yang dipimpin Pdt.Vera Ericka Br.Ginting, direktur Percetaken dan Toko Buku GBKP Abdi Karya Kabanjahe,

Suplemen PA Mamre Tgk 30 April - 6 Mei 2017, Ogen Kuan-Kuanen 2 : 1-8 ; 16:16

Nast :

 Kuan-Kuanen 2:1-8; 16:16

Tema :

Kepentaren Ergan Asangken Emas

Tujuan :

Mamre erdiate ras erpemere nangdangi peningkaten pendidiken anak

 

 

 

 

Metode : Diskuas ras Aksi spontan

I. Kata Penar 

Kebodohen ras kemusilen e me masalah si umumna iadapi negara-negara berkembang termasuk negarata Indonesia. Banci kataken maka buen denga kalak la sekolah ras bodoh asangken kalak si erpemeteh ras pentar. Kebodohen erbahanca murah kal itokohi ras ibodoh-bodohi kalak. Erkiteken kurang pemeteh me maka mesunah ipecah-belah kalak. Kebodohen erbahanca sulit terarapken kemajun. Sebalikna, adi erpemeteh ras pentar tentu megegeh ras beluh, pembangungen pe erdalan alu lancar. Kentaren ras pemeteh erbanca kita terhormat ras isegani kalak. Kita sebage anak-anak Tuhan la banci kem. Kai banci si ban guna nampati anak-anakta, sekeleweta gelah erpemeteh ras pentar. Mari erlajar kita arah kata Dibata.

II. Isi/ Tafsiren

Kitab Kuan-Kuanen termasuk kubas kitab hikmat/ kepentaren ibas kalak si pentar nari. Ibas kitab Kuan-Kuanen sijumpai pernyataan si gendek, padat ras jelas kerna erbage situasi ibas kegeluhen. Kitab Kuan-Kuanen irancang lako ndatken perhatin ras mabai kita gelah rukur. Kuan-Kuanen mereken pengertin, perspektif ras pentunjuk, labo peraturen-peraturen si keras dingen kaku. Kuan-Kuanen mpebetehken bahwa sada prilaku/ perbahanen tertentu biasana mereken asil si mehuli; ras perbahanen si debanna mereken asil si la mehuli. Tentu kalak si pentar pasti milih perbahanen si perlebe ndai. Kalak bodoh/ lenge ngenca si milih perbahanen si peduaken.

Kuan-Kuanen 2:1-8 si jadi ogenta lit ibas judul perikop ‘Guna Kepentaren’. Arah Kata Dibata si jadi ogenta enda si datken dua pelajaren. Sipemena: Pendilo guna ndatken kepentaren (ayat 1-4). Penulis Kuan-Kuanen enda ndilo manusia/ kalak si megisa lako mpelajari si ikatakenna, janah la ngelupaken kerina si enggo iturikenna. Guna ndatken kepentaren maka arus kepe megermet nangdangi kepentaren e jine jenari encubaken ngantusisa (ayat 1-2). Manusia arus aktif guna ndatken pemeteh ras pengertin si icidahken arah kata-kata ‘pindolah, seksekilah, daramilah, ayakilah’. Manusia arus ndarami ras ngayaki pemeteh ras kepentaren desken emas ras erta si terbuni (harta karun). Pemeteh ras kepentaren e desken emas ras erta-erta si meherga si terbuni (ayat 3-4). Terlebih ibas 16:16 ikataken maka kepentaren ras pemeteh e ndauh ergan asangken pirak ras emas. Adi erga pirak ras ermas tergantung berat ras karatna. Tapi pemeteh ras kepentaren la bage. Emas ras pirak la ngasup nukur pemeteh ras kepentaren, tapi pemeteh ras kepentaren ngasup nukur melala emas ras pirak. Jelas dage man banta maka ndauh ergan pemeteh ras kepantaren asangken emas. Sipeduaken: Ingan ndatken kepentaren (ayat 5-8). Perlu jelas ieteh manusia bahwa ingan ras ulu eme arah erkemalangen man TUHAN. “Guna ndatken pemeteh, si pemena si la banci la lit ibas kalak eme mehamat dingen erkemalangen man TUHAN. kalak lenge la nggit mperdiateken kepentaren dingen la ia nggit erlajar (1:7). Arah ndatken pemeteh ras kepentaren me maka si eteh si eteh kai ertina erkemalangen man TUHAN, jenari si dat pemeteh kerna Dibata (ayat 5). Tuhan si empuna pemeteh, pengertin ras kepentaren. TUHAN si mereken kepentaren e man manusia (ayat 6). Man kalak si benar ras bujur iberekenNa penampat ras ampang-ampang. Ia si ngkawali kalak si bujur perbahanenna janah iampang-ampangiNa kalak si tutus man baNa (ayat 7-8).

III.Aplikasi/ Pengkenaina

1. Mamre la banci lang terus ertoto ras erusaha gelah tetap megermet, erlajar lako ndatken pemeteh, pengertin ras kepentaren guna keriahen ras kemalemen nggeluh. Ula meter merasa puas nangdangi pemeteh ras kepentaren si enggo lit. Tambah-tambahilah pemeteh ras kepentarenta alu mehamat ras erkemalangen man Tuhan. Pemeteh ras kepentaren e jadi pengawal ras ampang-ampang si ibereken Dibata man banta.

2. La terjeng kita ngenca erpemeteh, erpengertin dingen pentar singkawali ras si ngampang-ngampangi geluhta tapi pe anak-anakta. Adi kita ngenca jenari anak-anakta la erpemeteh ras pentar banci kataken kita bapa si gagal, la sangap. Emaka mari radu ras (ras-ras) anakta kita erlajar nambahi pemeteh ras kepentarenta (bnd. Josua 24:15b).

3. Janah la terjeng anak-anak bas jabuta (anak-anak biologista) ngenca erpemeteh dingen pentar tapi pe anak-anakta si lit ibas gerejata (anak-anak kiniteken). La seri kerina gegeh ras kengasupen orangtua/ Mamre bas gerejata. Lit si megegeh, lit si kurang gegehna. Lit si mbue buatenna lit si sitik ngenca buatenna. Rutang si megegeh nampati si kurang megegeh. “Tapi gelah ola si tualen kelebihen si lit ibas kam gundari ras kekurangen si lit ibas kalak e gundari. Kune denggo kelebihen ka kalak e, i aka denggo encukupi kekurangenndu. Alu bage lanai situalen…” (2 Korinti 8:13-15).

4.Ibas gerejata terkhusus bas kategorial Mamre lit program beasiswa lako nampati biaya pendidiken man anak-anakta si tutus erlajar, berprestasi tapi orangtuana kurang gegeh secara materi. Ula kal ia putus/ ngadi sekolah ras la seh cita-citana erkiteken la cukup biaya bas orangtuana nari. Arah seh sekolahna ras tercapai cita-citatna erguna ia man masyarakat, bangsa ras negarata terlebih nangdangi Kinirajan Surga. 

5.Pendidiken anak-anakta e me investasi si mbelina kal ibas geluh enda. Silahkan ras iajuk kita lako berinvestasi bas barang subuk barang la bergerak bagepe si bergerak (misalna: emas, taneh, rumah, juma, kebun, rsd. Tapi si terpenting kal e me pendidiken anak-anakta seh maka ia erpemeteh, erpengertin dingen pentar. Ia berilmu ras beriman. Enda me sierbahanca kita ras anak-anakta jadi pasu-pasu man doni enda (bnd. 1 Korinti 3:9).

                                         Pdt. Juris Tarigan, MTH

                                              (GBKP Depok – LA; 081316879945)

 

   

Suplemen PJJ Tanggal 30 April -06 Mei 2017, Ogen Masmur 66:1-9

Tema :  Enggo kuangka perbahanen Dibata arah sekelewetku
(Masmur 66 : 1 – 9 )
 
 
1. Perdalinen kegeluhen kalak sierkiniteken banci kataken unik, sabab salah sada hal sipenting ibas kegeluhen eme “ngataken bujur” man Dibata. Ngataken bujur labo saja tupung reh sibagi ukur tapi pe paksa reh sila bagi ukur.Alu kata sideban Kalak sierkiniteken arus ngataken bujur ibas sikugapana pe geluh enda.

Sekalak Perbapan ngataken Bujur ia erkiteken icopet kalak dompetna, Engakai??? Nina: Sisitikna lit 3 hal maka aku ngataken Bujur:
Sipemena : Rembang la melala isina dompetku si copet kalak e
Sipeduaken : Dompetku buatna, labo kesahku
Sipeteluken : Aku icopet labo aku sipencopet.
 
2. Pemasmur ibas bahan PJJ.nta sendah ngajuk kita guna ngataken bujur nginget perbahanen Dibata ibas sejarah kegeluhen bangsaNa.Mehantu kal perbahanenna; isalihkenNa lawit jadi taneh kerah......iperdiatekenNa bangsa-bangsa maka ola memberontak man baNa.(Ayat 5-7).
Sijadi penungkunen man banta ibas kita ndalani kegeluhenta, seh ija kita ngidah maka Dibata e tuhu-tuhu mehantu, Dibata e ngasup mereken serpang pulah man banta?
 
3. Pemasmur mpertegas ulang guna pemuliaken Dibata labanci lang lit “pengakun" kerna perbahanen ras kinibisan Dibata. Pengakun siperlu sisehken langsung man Dibata.Pengakun labo terjeng kata-kata saja tapi pengakun ibas pusuh sibersih nari.
Katakenlah man Dibata , nindu “andiko, mejin tuhu perbahanenNdu”
Adi kita ngakuken Tuhan, e berarti paksa sie kita enggo ngaloken kuasa Tuhan, kita ngendesken geluhta guna kemuliaan Tuhan, kita encidahken maka Dibata sangana erdahin/erkuasa ibas kegeluhenta.Ibas Amsal 3: 6 nina "Akuilah Dia dalam segala lakumu, maka Ia akan meluruskan jalanmu" .
 
4. Pengakun nandangi kinihantun Dibata , labo hanya guna pribadi nuduhken hubungen si akrab ras Tuhan tapi pe pengakun e seh kubas “pemberitan”/”kesaksian”. Marilah dingen nehenlah siibahan Dibata................(ay.5) O bangsa-bangsa Pujilah Dibata kami,berekenlah puji-pujinndu man baNa(ay.8)
Alu kata sideban Pengakunta nadangi kinibisan Dibata arus iterusken man kalak sideban.
 
5. “Enggo kuangka perbahanen Dibata arah sekelewetku” ertina arah kerina pengalamen kegeluhen, arah kai sijadi isekelewetta si idah Tuhan erdahin Dibata “campur tangan”, Dibata la pernah nadingken kita. Nina Pemasmur : Langit encidahken kemulian Dibata, awang-awang erberita kerna perbahanenNa.(Masmur 19:2). Bagepe Rasul Paulus ngataken "Sebab segala sesuatu adalah dari Dia dan oleh Dia dan kepada Dia: bagi Dialah kemuliaan sampai selama-lamanya " (Roma 11:36) dan kemuliaan Allah dinyatakan di dalam Yesus Kristus (Filipi 2:11).
 
Pdt. Iswan Ginting Manik
Runggun Pondok Gede
   

Suplemen PJJ Tgl 23-29 April 2017, Ogen Perbahanen Rasul-Rasul 14 : 8-20

Nats :

Perbahanen Rasul-Rasul 14: 8-20

Thema :

Erlajar Arah Perberita Simeriah

 

1. Sebagai perberita simeriah tentuna melala pengalamenta. Baik kita si pernah melayani i - kuta-kuta bagepe ikota. Adi kami 10 tahun nai melayani ikuta tentuna erbage pengalamen sebab lit 9 kuta sebagai daerah tujuan er PI, janah medanna cukup menantang sebab lit deba nggunaken kendaraan Jeep Willis, sepada motor tapi buen nggungaken dalan nahe, sebab hampir mentasi deleng ras kerangen kabupaten karo ras Deiri. Emaka mengati nge kendaranta man sorongen, man angkaten bas kubang simbagas. Enda sekilas pengalaman perberita simeriah, tapi dibalik kini seranlit keriahen si luar biasa. Sebab Tuhan Yesus lapernah nadingken kerina perberita simeriah e, sera suinta kerina idungina alu mereken keriahen si tuhu-tuhu. Tentuna kampe lit pengalamenndu enda me menyemangati kita kerina guna erberita simeriah e seh gundari, Puji Tuhan arah pengalamenta kerina banci tole menyemangati teman-temanta si sama sekali lenga lit pengalamenna erberita semeriah.

 

 

2. Paulus ras Barnabass, sebagai pilihan Tuhan muat bagin guna meritaken berita simeriah. Emaka waktu ia i Listra sipertama ijumpaina sekalak anak dilaki silamegegeh nahena . Emaka iawalina erbahan simehuli lebe, icidahkena kuasa Dibata arah malemna pinakit anak e, ija lompat ia kenca ikatakenna “ Tedisken pepinter nahendu !” emaka ersurak kalak kerina , ngidah perbahanen paulus ndai. Endame kepeken sada perbahanen kuasa Dibataarah perberita simeriah, menyenangkan hari orang yang kita datangi. Janah arah keriahena maka banci ialokenna Yesus sebagai Tuhan ras Juruselamat, sebab nina Yesus “ Aku kap dalan kempak Bapa ... (Yoh 14: 6) “. Emaka kita singgo tek wajib nuriken ras nuduhken dalan situhu-tuhu man kerina jelama.

Kepeken erkiteken perbahan para rasul ndai maka iakap kalak kuta e, enggo reh dewa-dewa , enggo nusur dewa-dewa kutengah-tengahta bagi manusia (ayat 11) . Emaka ate kalak e ras imam-imam dewa zeus mempersembahken jenggi lembu ras bunga, sehpe gelar Paulus ras Barnabas enggo igantina jadi zeus ras hermes. (ayat 11-13). Kesempaten enda , manfaatken Rasul-rasul e guna beritaken berita simeriah, emaka la ialoken Rasul-rasul e kai sinibahan anak kuta e, nina paulus “kami pe manusia nge seri ras kam “. Kami reh kujenda eme meritaken berita simehuli, gelah tek kam man Dibata singgeluh, sinjadiken langit ras doni, lawit ras kerina isina gelah ulanai iakokendu perbahanen si sia-sia enda ( ayat 15).

Teridah maka rasu-rasul e la merincuh ipuji ras isembah, tapi ipeterukna bana sebab ia hanya ipercayaken Dibata lako ndalanken tugas pangilanna sebagai pemberita simeriah.

 

3. Kita pe   enggo ipercayaken Tuhan Yesus guna meritaken berita simeriah. Enggo 127 tahun Berita simeriah ialoken kalak karo, memang enggo melala perbahanen GBKP enda ibas ia meritakenca, aminna BSM e lenga ngadi, emaka kita labo erpuas-puas ibas perbahanen Dibata man banta, sebab mbelang denga siman peranain, kurang simeranisa, emaka man banta kerina harus bagi pengakuan Nabi Yesaya : Enda aku suruh lah aku( Yesaya 6 : 8). Janah lanai lit kompromi, janah ibas kita meritakenca maka kita meneladani para Pdt,Pt,Dk ras jemaat si enggo leben asa kita, janah kita meritaken labo kita ndatken pujin, ras penghargaan tapi sidat pujin eme Ia (Yesus). Simada GerejaNa GBKP. Gelah arah pendahinta reh mbarna berita simeriah e ku kerina jelma.

Man banta khususna Klasis Jakarta Kalimantan ras Bekasi Denpasar ibas bulan September – Oktober 2017 pagi muat bagin ku Klasis Barus Sibayak, ija lit pagi + 25 kalak temanta tading i daerah enda 1 bulan, emaka kita mendukung alu daya, doa ras dana.

Bage man banta Klasis Jakarta-Kalimanta, maka wilayah Kalimata me memerupaken daerah siakan kembangken injil Kristus arah GBKPnta enda. Sebab gundari enggo nimai teman-temanta idaerah enda gelah sidahi.

Emaka radu ras kita ikut muat bagin, gelah GBKP simalem enda terberita i Indonesia enda bahkan ku manca Negara .

 

                                                                                   Selamat er PJJ ras erberita simeriah.

 

                                                                                                      Pdt Andarias Brahmana.

   

Suplemen PJJ tanggal 16-22 April 2017, Ogen I Korinti 15-53-58

Nast :
I Korinti 15 : 53-58

Tema :
Ras Kristus kita menang.
 

1. Adi isingetken kata menang berarti lit sikalak, janah adi isingetken menang kalah berati lit pertandingen/ siman lawan emaka ibas pertandingen e lit si sikalah lit si menang. Janah kerina kalak bertanding pasti ersura-sura gelah menang tapi malabo kerina banci menang/pemenang. Emaka gelah banci ndatken kemenangen maka ope denga pertandingen harus latihen/melatih diri terus menerus, latih latampil latih, las latapil lasn udan la tampil udan, menurun, menanjak, lurus belok-belok harus kerina ihadapi guna ndatken kekuaten si luar biasa. Emaka adina lawanta e hebat banci si kalahken dingen kita me pemenangna ( enda duniawi).

Bageme kita sebagai kalak kristen (jemaat), maka kepeken seh asa gundari tetap kap kita ibas gelanggang pertandigen, musuhta eme kuasa jahat, doni enda dem alu berbage bage kejahaten sini ipengaruhi iblis, janah kita me musuhnasi atena italukenna. Kita harus siap sedia (mempersipken) ken dirinta gelah ula kita banci talukenna. (band I kor. 9 : 24-27).
Emaka silatih lah dirinta erpalasken kata Dibata, dingen tetap kita ras kristus Tuhanta.

2. Teksta enda ngingetken man banta eme peristiwa kekeken Tuhan Yesus ibas simate nari, ija kenca ikuburken ibas wari peteluken maka kek Ia, dingen italukena kuasa kematen (Markus 16 : 6). Emaka doni kematan italukenNa, Ia keke utuh bagi kuga nai ope denga ia mate i kayu persilang.
Emaka sada keriahen man banta sitek man Yesus, sebab ibas ia enggo naluken kematen, maka kita pe ikut menang radu ras Tuhan Yesus, emaka kai sibiak doni enggo banci sitaluken erpakasken biak sirehna idur Tuhanta nari eme si masap-masap enggo igantiken ku biak sila ermasap-masap si labanci mate (kegeluhen- situhu-tuhu) bagi Yesus keke maka kita pe keke pagi guna kulanta iubah alu simbaru (ayat 53-54).

Kematen enggo itelan kemenangen enggo reh, emaka kuasa kematen e enggo italuken, lanai erbisa/la ergegeh kuasana (Ayat 55). Kematen /dosa enggo italukenNa, kemenangen enggo iberekenNa man banta (Ayat 57). Man banta kepeken labo ngadi bertanding, tapi bertanding radu ras Kristus Tuhanta sipemenag e. Emaka kita labanci lengah harus berkeyakinan teguh, tutus ibas ndahiken dahin si enggo ipercayakenNa man banta kerina. Kai sidahiken kita la percuma, eme kemenagen (ayat 58).

3. Pertarungan dunia lanjut, tapi kita harus megegeh, eme kita harus radu ras Kristus sienggo menang e, Janah lanai lit kebiarenta guan ngalakenca. Emaka ibas dalani kegeluhen doni enda tetap setia ndalaken kataNa, dingen tetap erberita simeriah arah perbahanta, pengerana bagepe arah kai silit ibas kiita (melayani).
Sebab kita nggeluh la rikutken sura-sura doni enda, (manusia) tapi kita nggeluh rikutken sura-sura Dibata ( Band Roma 8 : 9).
Janah guna menghadapi kerina si nyata ibas geluh enda maka kita harus memperlengkapi dirinta alu senjata Rohani ( Band Epesus 6 : 10-20).
Bagi ende-endenta no . 360 ( Ibas Tuhan Aku megegeh).
Bagepe lit ende-enden anak KA-KR.
Bila iblis mengganggu tembak saja.
Katanya jangan maju-maju saja.
Yesus memberi kemengan, oleh darahNya Kudus.
Yesus Memberi kekuatan , kita menang.
 
Selamat ber PJJ
 
Pdt Andarias Brahmana.
   

Suplemen PJJ tanggal 09-15 April 2017, Ogen I Petrus 3:17-20

Bahan :
I Petrus 3 : 17-20

Thema :
Nggeluh ibas pengarapen
 

1. Lit istilah : masa lalu penuh kenangan , masa kini perjuangan dan masa depan eme penuh pengeharapan. Janah kita gundari ngeeluh eme kita tetap berjuang, erdahin gelah ndatken hasil si luar biasa, janah lenga si eteh kai si terjadi arah perjuangen e, namun kerina kalak lit pengarapenna maka ia berhasil si luar biasa, gelah malemkel ate.
Gambaren enda me perdalanen geluhta sebagai kalak kristen, kita kerina nggeluh ibas kiniteken, tek man Tuhan Yesus, janah pengarapenta kai sini janjiken Yesus man banta banci min sidatken pagin. Emaka kita terus alu giat erdahin, erkiniteken gelah sukacita dunia juga sukacita Surga.
Ertina doni pe jadi milikta Surga pe pagi dat ka , tapi guna sienda kerina maka harus alu perjuangen, dan berjuag. Berjuang radu ras Kristus Tuhanta eme ija kita harus punya pengarapen, pengarapen sitetap eme tetap nggeluh ras Tuhan Yesus.

2. Nai nari (Mulai jaman Yesus seh asa gundari tetap si idah lit kiniseran –kiniseran si inanami. Yesus pe mualai ia ndahiken dahinNa, bagepe ia seh mate i kayu persilang, bagepe seh Yesus nangkih kusurga tetap ijumpanina kiniseran-kiniseran, bagepe murid-muridNa seh ngayak ndnadingken doni enda jumpa lalap kiniseran. Sehpe sebagian besar ajar-ajar mate ndatken peniksaas, si idah Paulus pe sebagai Rasul haruska mate isiksa ras ibunuh tapi aminna bagepe labo ersurutna kiniteken jemaat, sebab hal enda enggo iungkapken paulus man perpuluhen Pilili ( Pil 1 :12-14).
Kepeken kita enggo ituntut erbahan simehuli arah sikap hidup, sebab kalak kristen eme sira ras terang (matius 3 :13-16), emaka gelah banci jadi saksi sikugapanape harus ialakenna, la surut kinitekenna e, sebab eme perbahanen simehuli (sura sura Dibata).

Adi ndalaken sura-sura Dibata kita njumpai kiniseran tetap tabah, setia dingen ngalakenca alu dem kesabaren. Berarti adi kita ebahan si jahat menandaken Yesus e si sia-siaken ia mate ikayu salib, tapi adi kita tetap erbahan simehuli dingen ngalaken hal-hal silabagi ukur maka pengorbanen Kristus e erguna man banta. Arah pengorbanenNa maka kita erpengarapen nandangi wari-wari sireh e, arah kita tek ras ndalaken simehuli, maka ibabaina kita rembak ras Dibata (Ayat 17-18)
Ibas Jaman Nuh mela kalak megombang man Dibata arah Nuh, i ejek-ejek na kal Nuh si erbahan kapal idas uruk, tapi Dibata erkuah ate , emaka arah kematen bagepe penguburan Yesus lit kesempaten guna meritaken berita ibas Dibata nari man tendi-tendi si tertaban e, (ayat 19-20).

3. Dibata ndalaken kelengna e , gelah ula min manusia si jadikenNa e, gelah ula min ia bene ibas dosa, tapi gelah ngeluh erkiteken kuasaNa e, Dibata arah kematenna AnakNA/ ikubur pe ia nehken berita keselamaten. Emaka katawari saja pe ipakeNa waktu nehken berita simeriah e man kerina si enggo ndabuh kubas dosa, gelah bagi janji Yesus “ gelah ija Aku ije Kampe “ (Yoh 14 :3).
Emaka kalak si erpengarapen ibas kegeluhenna tetap ia berjuang guna keselamaten na , sebab kai siniarapken e bakal seh me pagi paksana si loken. Kemalemen ate e enggo jadi sikerajengnta seh rasa lalap, bahkan bas kegeluhenta gundari pe enggo banci sinanami keriahen e, apaika pagin ras Yesus ndai ( Band Masmur 37 : 25)

Pengarapen e lenga bo teridah tapi pasti lit dingen ijumnpia me pagi. Emaka tetaplah erdahin, ersaksi, melayani sungguh-sungguh. Kita berharap nandangi sipasti eme nggeluh ras Tuhanta Yesus Kristus.
Selamat ber PJJ
 
Pdt Andarias Brahmana.
   

Page 9 of 152

BP-KLASIS-XXX

"SELAMAT DATANG mengunjungi Web GBKP KLASIS JAKARTA-BANDUNG"

Renungan

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15

Pengunjung Online

We have 363 guests online