Suplemen PA Mamre tanggal 20-26 Agustus 2017, Ogen Miha 2:1-13

Renungan

Tema:
"Mamre Si Merdeka"

Tujun:
Gelah mamre:
* Meteh makna kemerdekaan.
* Nggeluh selaku Mamre si enggo merdeka.
Metode : Perenungen.
 
 
Kata Penaruh
Kira-kira 350 tahun indonesia ijajah belanda ras 3,5 tahun Indonesia ijajah Jepang. Pejuang bangsanta enggo erpala-pala memperjuangken kemerdekan bangsanta salu gegeh kengasupen ras persenjatan si lit. La sia-sia ulih latih na ndube, ibas perkuah ate Dibata ibas peristiwa ibom Sekutu kota Hiroshima ras Nagasaki maka Jepang menyerah ras mulih ku negerina, i je me iproklamasiken kemerdekan Indonesia ras iakui bangsa-bangsa. Penjajahen Belanda ras Jepang enggo berakhir, tapi perjuangen pembangunen la pernah berakhir. Tanggung jawabta ras-ras memperjuangken kesejahteran bangsanta. Melala denga persoalen persoalen i hadapi bangsanta; kemusilen, angka prestasi kesehaten si rendah, kesenjangen sosial, persatuan si terancam, mahalna biaya pendidiken, narkoba, tingkat kejahaten si tinggi, kurangna kepercayan rakyat nandangi pemerintah, permasalahen politik, bencana alam, kerusaken lingkungen, limbah ras sidebanna. Sebage warga negara si ertanggung jawab ibas hal kai nge sibuat baginta ibas ngisi kemerdekanta?

Uraian / Pembahasen Teks
* 2:1-5; Cilaka man kalak si memonopoli taneh.
Adi manusia ngelupaken moral ras etika, janah muas ras merangap nandangi erta doni, keadaanna e akan mempengaruhi cara rukurna ibas nandangi temanna manusia. Kemerosoten moral ras etika erbahansa manusia la ngasup rukur sehat (waras), lanai bo ia ngasup ngukurken ras ndalanken kedamen man temanna manusia, sebab perayakenna e me kepuasenna jine, janah kalak si ngayaki kepuasenna langa bo ia ngadi mperjuangkensa (alu segala cara) gelah idatkenna.

Kalak si enggo kecandun erta, si mengga atena juma kalak, mengga atena rumah kalak ras sidebanna ibas nggegehi sura surana e ibabana me sura-surana e ku inganna medem, la ia tunduh-tunduh guna ngukurken strategina si jahat gelah idatkenna erta kalak si imenggaina e. Kalak si bagidi e umumna e me kalak si ibas ia lit kuasa "pejabat pemerintah entah kalak si erpengaruh" si seharusna tugasna gelah rakyat sejahtera tapi si ilakokenna sebalikna itindasna ras ibuatna ertana. Berngi wari ia ngukurken cara ndalanken sura-surana si jahat, terang kenca wari mis ka idalankenna. Man kalak si bagidi e nina Miha "CILAKA!" Arusna tanggung jawabna ngangkatken kegeluhen rakyatna tapi isengsarakenna jadi tuna wisma ras ibas irampasna juma kalak ijadikenna kap rakyatna e jadi budak.

"Cilaka!" Ertina "awas" sebab la senang ate Tuhan nandangi pemimpin si erkuasa tapi la mperdiateken kesejahteran rakyatna terlebih ka si ilakokenna mpemusil ras erbahan rakyatna menderita, janah ia ersenang-senang i babo penderitan rakyatna. Cilaka si irancangken Tuhan e me seh kal beratna, janah labo ia ngasup mpepulah bana ibas hukumen e nari. Si ibereken Tuhan kegulutun si erbahanca ia meteruk rukur. Ibas bahasa Indonesia nina, Tuhan merancangkan malapetaka dari padanya dan kamu tidak dapat menghindarkan lehermu dari padanya. Allah mempersiapkan tali kekang dengan beban yang berat yang akan di ikatkan di lehennya sehingga meski mereka memiliki kuasa tapi mereka akan berjalan tunduk oleh beratnya beban tali kekang yang terikat di lehernya maka pada saat itu mereka tidak akan dapat lagi berjalan dengan tegak-angkuh.

Adi enggo seh paksana penghukumen Dibata e, si penindas jadi kuan-kuan penguru-ngurun kalak. Nina kalak ngende-ngendeisa "Enggo keri kal kami radas! Tuhan enggo muat taneh kami, janah iberekenNa taneh e man kalak si naban kami." Kata kata enda banci iertiken, Tuhan memang ngijinken taneh kami irampas si penguasa e tapi seh ka me paksana taneh e mulih man kami, tapi si penindas e la dat kai pe. Ertina labo lit kemakmuren man bangsa si bayak dingen megegeh, labo dat bagin taneh adi la kin iperdiatekenna moralitas maka labo ia dat bagin warisen Tuhan.

* 2:6-13 Pemberitan Palsu jadi Perlawanen Ibas Nabi-nabi Penipu si i taluken Pengajaren ibas nabi si Benar.
I belana si penindas e nina "Dibata labo nggit njuruken kami."
2:7; Pemberitan palsu si ipepinter nabi si benar entah "Kesah Tuhan".
Isumpahi Dibata kin bangsana? Tuhan engkelengi bangsana labo numpahisa. Banci kin bene kesabaren Tuhan? Tuhan e dem ate sabar, labo banci bene kesabarenNa. Lit kin tindaken entah tujun Dibata meneken bangsaNa? Si penindas la payo adi ianggapna Dibata e sumber petaka. Dibata e dem alu pasu pasu guna masu-masu bangsana janah kataNa e kemalemen ate man kalak si nggeluh ibas kebenaren. Labo Dibata sumber kesusahen bangsaNa tapi kejahaten si penindas nge.

2:8-9, Tole icidahken Tuhan kejahaten si penindas.
Nina Tuhan ngaloi si penindas ras nabi palsu, lebih kap akal ras kejahaten si penindas e. Kejahaten si penindas e seri ras kejahaten musuh ibas peperangen. Sanga kalak si terbuang ibas peperangen ngalami penderitan, iakapna adi mulih ku kutana ije me kari maka aman ras dame, tapi i kutana la idatkenna kesejahteran ras kedamen, sebab si penindas enggo ngerencanaken kejahatenna, irampasna jubahna (harga dirina ras identitasna). Diberu ("janda") si seharusna dat penampat tapi ijadikena tunawisma, ras anak-anak si isenangi Tuhan banci rende mpermuliaken ia ipedauhna ibas rumah Tuhan nari.

2:10-11, Tegoren ras perintah nabi si benar man si penindas ras nabi palsu.
Jelas ras tegas perentah nabi Tuhan, ipelawesNa si penyebab kesusahen bangsa Tuhan. Dosa-dosa si penindas e enggo erbahansa kesusahen ras cilaka negeri e. Bangsa Israel pe lanai tek ras enggo nulak pengajaren nabi-nabi palsu si memabukken alu tipu ras kata-katana si guak e. Sedekah si penindas ras pemberitan palsu lit itengah-tengah Israel labo banci terjadi kemakmuren ras kesejahteran.

2:12-13 Pemulihen Bangsa Dibata
Seh me paksa Tuhan memulihken Israel, i persadaNa me mulihken bangsaNa si enggo merap marpar e desken biri-biri si mulih ku rarasenNa. Ije me ia jumpa permakanNa si ngkawali ras mere pangan inemen si cukup man bana. Ibas ayat 13 enda lit nubuaten kerna kebebasen ibas kerehen Kristus (sipedua kaliken) ija seh me paksana kehadiren pemerintahen Tuhan i tengah-tengah bangsaNa si naruhken bangsa e ku kemakmuren ras kesejahteran.

Aplikasi ras Renungan
* Adi Indonesia enggo 72 tahun merdeka, seharusna enggo min banci bangsa enda ngenanami kemakmuren ulih kemajun ekonomi, sosial, politik, hankamnas, kesehaten, pendidiken ras sidebanna. Tapi kenyatanna, umpamana ibas pertumbuhen ekonomi kata-kata si ngataken "Yang kaya makin kaya, yang miskin makin miskin" lalap denga jadi perbeben. Nilai-nilai moral langa ijunjung tinggi ras kebodohen langa teratasi.

* Itengah-tengah pemimpin, kalak si erpendidiken, si erjabaten, erpangkat ras sidebanna, si enggo nehken sumpahna (janjina) ertanggung jawab asa gegeh si lit membangun ras mensejahteraken bangsa megati denga terdat si mpebayak dirina ibas erta rakyat nari ( korupsi), pengadilen si la adil, kejujuren si la jujur, ras sidebanna, kalak si bagidi e me sumber permasalahen penyebab kesusahen.

* Kuga Mamre ibas bidang pendahin ras si itanggung jawabina, enggo nge idalanken alu payo? Enggo nge Mamre terteki ras jujur ibas makeken jam kerjana, uga pendalankenna tanggung jawabna sebage bapa, sebage anggota gereja, sebage serayan? Banci nge si kataken Mamre enggo ngasup ndalanken kemerdekan si ertanggung jawab ibas mengelola kemerdekan arah ikut ertanggung jawab mperjuangken kesejahteran teman manusia? Seharusna Mamre enggo min seh ku bas perayaken nampati kalak siman sampaten, keluarga si man sampaten, teman entah tetangga si man sampaten gelah pulah ibas kesulitenna nari. Asa gegeh ras kiniliten si lit adi turahlah kiniten e mamre labo pernah jadi penyebab kesusahen kalak.

Salam Merdeka!

Pdt. Ekwin W. Ginting Manik
GBKP Runggun Cikarang

Login Form