Khotbah Pekan

Pekan Doa Sedoni Wari VII, Ogen I Koritnti 2:9-16

Renungan

Tema :
Kesah Si Badia Mereken Gegeh Ndalanken Pedah
 
 
Pengantar
Tanda kerehen Kesah Si Badia man kalak si tek si isuratken ibas Perbahanen Rasul-Rasul 2 eme lidah-lidah api si nusur ku kerina kalak si tek. Jenari kerina ia ngerana alu bahasa-bahasa lain si niajarken Kesah e man bana. ‘Bahasa Roh’, e me istilah si rusur sipake gundari. Pengangkan kerna Bahasa Roh enda sering menimbulkan diskusi si cukup mbages antara kita kalak si tek si berbeda pemahamen. Adi la berapi-api ras la lit bahasa roh, berarti la lit Kesah Si Badia, piga kali ibegi kita komentar si bagenda rupa. Uga responta? Lit si tersinggung, lit ka si nggit rukur manjar-anjar. Bahan khotbahta mereken penjelasen maka Kesah Si Badia e erdahin ibas kalak si tek mereken pengangkan man banta.
 
Isi
Ibas bagin surat enda Rasul Paulus ngutip isi Kitab Jesaya (Jes 64:4), ija Nabi Jesaya tek maka cara Tuhan nampati umatNa la terantusi manusia. Kai si langa pernah iidah, ibegi, iukuri manusia, e si isikapken Dibata. Tapi alu cataten enda la ibereken man sembarang jelma, tapi man kalak si erkeleng ate man Dibata. Tentu alu perukuren manusia banci turah penungkunen, adi bage ja nari ieteh kami maka enggo jadi ntah pe enggo ialoken kami kai si isikapken Dibata e? Me sada pe la pernah ngidah, megi, dingen ngukurisa? Alu jelas Paulus njelasken, kai si isikapken Dibata e ipetangkas man kalak si erkeleng ate e arah KesahNa. Rencana Tuhan, isi pusuh Tuhan kerina ipepayo Kesah e. Puji Tuhan, kalak si tek ngaloken Kesah si ibas Dibata nari. Lit piga-piga penekanen kerna Kesah Dibata e:

1. Kesah e Ngajari Ngerana (ay 13)
Paulus ras teman-temanna ngerana kerna kebenaren pertendin, sada ajaren teologis si mendasar. Ibas ia nerangken kerna si e, labo kata-kata ras kepentarenna secara manusaia si ipakena, tapi kata-kata si iajarken Kesah Dibata.

2. Kesah e Mereken Pengangkan (ay 14-16)
Kalak si lit ibassa Kesah e ngenca ngasup ngangkai si iterangken Paulus. Sebab cara Dibata la seri ras prediksi-prediksi manusia. Bahkan penguasa doni sekalak pe la meteh kepentaren e. Sabap adi ietehna, labo min ndai ipakukenna ku kayu persilang Tuhan Jesus e (ay 8). Memang secara rasional mesera ngaloken pemahamen kerna Juruselamat si membebasken ras nelamatken e harus mersan silang dingen mate i kayu persilang, sebab i ja pe si mate e pasti nge talu labo menang. Bagepe kerna kekeken Jesus ibas wari peteluken, adi secara rasional siukurken la terterima kita. Sebab kai si iban Dibata arah Jesus e sada hal si trans-rasional, melampaui akal kita. Emaka peran Kesah Dibata tuhu krusial ibas mpetangkas kerna si e. Si lit bas ia Kesah e, iangkana. Si la lit ibas ia Kesah e, si lang-lang akapna e kerina. Jadi tangkas me man banta maka peranan penting Kesah Si Badia eme mereken pengertin kerna Dibata man perukurenta si terbatas enda. Tandana lit Kesah e itengah-tengahta, siangka perbahanen Dibata.
 
Paksa si genduari, Kesah Dibata e lebih populer isebutken alu gelar Kesah Si Badia. Enda me si ipadanken Jesus man ajar-ajarna. Enda me si itima-timai ajar-ajar selama 10 wari ija ia kerina ertoto alu tutus, janah menaken tahun enda gerejanta GBKP ndalanken kai si iban ajar-ajar e. Mehuli kal adi ibas 10 Wari Ertoto e la lit sada wari pe terlewatken kita ERTOTO ALU TUTUS. Labo harus kel berapi-api, entah pe bagi berpuisi, si penting alu pusuh si tuhu-tuhu kempak Dibata. Bahkan si la terturiken kita alu kata-kata pe eteh Dibata arah pusuhta si ngerana man baNa.

Kesah Si Badia si erdahin ibas kita, ibas gerejata, mereken pengangkan man banta kerna sura-sura Dibata. Adi siangka perbahanen Dibata bas geluhta, siangka kai sura-surana, ibas ndalanken pedah Dibata e pe labo siakap mberat. Kesah si Badia e la saja mereken pengangkan, tapi pe mere gegeh guna ndalanken sura-sura Dibata ibas kegeluhenta. Jadi kalak bujur ibas doni s idem kecurangen enda mesera, sebab lit sura-sura daging ibas dirita. Bagepe melawan arus itu sulit dan melelahkan. Emaka lalap nge siperluken penampat Kesah Si Badia gelah kita banci paguh dingen setia ibas kiniteken. Ngasup kita ngelawan sura-sura daging jenari siikutken pedah Dibata. Bagepe ibas si mberat si reh bas geluhta, tetap kita megegeh erkiteken Kesah Si Badia lit ibas kita. Adi iperdiateken kami, ende-enden arah KEE GBKP no 187 alu judul Gegeh Kuasa Kesah Si Badia enda rusur iendeken ibas situasi si banci melemahkan iman kita, bagi pinakit si mberat, kecedaan ate, ras sidebanna. Melala kejadin ija kita dat gegeh arah ende-enden enda:
Gegeh kuasa Kesah Si Badia ib’re Tuhan bangku tiap jam
Kawatari pe itemaniNa, iidahNa kai pe si kuban
perdalanku pe ikawaliNa, setan iblis ipelawesNa
kuasa doni la ergegeh bangku, Tuhan saja man ikutenku
Amin.
 
Pdt. Yohana S. Br Ginting
Perp. Samarinda
 

Suplemen PJJ Tanggal 14-20 Mei 2017, Ogen I Korinti 12:25-21

Renungan

 

“Aku Gereja, Kam pe Gereja”
(I Korinti 12 : 25 - 31)
 
 
1. Lit Iit 3 istilah simegati ipake Rasul Paulus kerna “pemere-pemere”
- Buah Roh / Ulih Kesah eme ciri – ciri watak kalak sierkiniteken. Ulih kesah enda arus ikembangken janah icidahken ibas kegeluhen sitep-tep wari.(Galatia 5:22,23)
- Jabatan Rohani eme “Keduduken” ibas gereja guna ndahiken dahin pelayanen rikutken siniendesken man sekalak-sekalak, Rasul, Nabi, Guru rsbna I Kor 12: 28)
- Karunia Roh eme erbage-bage kengasupen si ibereken Dibata man sekalak-sekalak (I Kor 12 : 4 – 11)
 
2. Litna perbedan kengasupen / Buah Roh (Mbelin-Kitik, Megegeh-Lemah, Mehaga-La mehaga, rsbna, mesunah kal terjadi “perpecahen” la siangkan. Si mbelin kitik akap sikitik, meresa ia paling benar.
 
3. Rasul Paulus nuriken hakekat gereja desken kula. ibas ayat 25:”Gelah kula e ula erbelah-belah......”. Sigejabken min aminna erbage-bage kengasupen silit ibas kita eme pemere Dibata, sigejapken min erbage-bage pemere silit ibas temanta e pe pemere Dibata nge. Adi bage lalit dalin sipandang-pandangen, sijuru-jurun.
 
4. Aku Gereja, Kam pe Gereja emaka mari bagi Nina kuan-kuan kalak Karo: “Adi kita si ageng-agengen radu mbiring, tapi adi sikuning-kuningen radu megersing”. Kita nge nentukenca(simegeh tah silamegeh) jadi Mbiring ateta kita/gereja tah jadi Megersing.
 
5. Kai dage siperlu silakoken? Ibas ayat 31, emaka ersura-suralah kam (Bhs.Ind. “Berusahalah”), kata enda tempa bertentangen ras kata “pemere Dibata”, sabab adi e pemere ma labo perlu iperjuangken?. Tapi ibas pengertin cakap karo kata “Ersura-sura” e merupaken respon nandangi pemere Dibata e. Ngajuk kita gelah pasif / nggeluh ibas kai siibereken Dibata man banta.
Ibas Bahan Renungen PJJ-nta Minggu enda ngajuk kita lako ber-aksi ndilo ras ngiahken teman-temanta silapernah ku perpulungen ras ku gereja, gelah encidahken dirina selaku gereja si nggeluh.
 
6. Ibas kalimat seterusna : “kuturiken ateku man bandu dalan simehulina kal”. Kai kin dalin simehulina kal? Kalimat enda babai kubas Pasal selanjutna(Psl.13) ija Paulus ngerana maka sipentingna eme: KEKELENGEN.

Kai pe kengasupen silit ibas kita, kai pe jabataenta arus e erpalasken Kekelengen.Adi erpalasken kekelengenlah pengelakonta la bakal terjadi perpecahen, la bakal terjadi la siangkan, la bakal jadi sikitiken ukur.
 
Pdt. Iswan Ginting Manik,M.Div
GBKP Pondok Gede
 

Pekan Doa Sedoni Wari VI, Ogen Daniel 6:1-14

Renungan

Tema :
"Ernalem Man Jelma Sienterem"
 
 
I. Bena Kata
Ibas pemerentahen raja Darius, Daniel umurna enggo 80 tahun. Daniel iangkat raja Darius jadi pejabat si meganjang ibas kerajaanna erkiteken lit kelebihen Daniel, eme tutus erkiniteken man Dibatana. Daniel pe sekalak pemimpin si ber-integritas ibas ndalanken tanggung jawabna sebagai pejabat.(Daniel 6:4-5). Darius ngangkat Daniel jadi pejabat, sada tingkat iteruh Raja Darius.

Kekuasaan siibereken raja man Daniel mpeturah cian ate kalak si enterem, enterem kalak ersura-sura guna munuh/menyingkirkan Daniel, erbage upaya ilakoken guna ndabuhken Daniel, tapi la erdalan, erkiteken la lit/la ijumpai kesalahen Daniel ibas jabatenna, ia kalak bujur, bebas korupsi.

Kiniteken Daniel ras kedisiplinenna ndalenken aturen agama man Dibatana jadi alat musuhna guna ndabuhken Daniel, tapi Daniel la surut ersembah ras ndalanken ibadahna man Tuhan ia tetap setia erkiniteken, tek Daniel maka Dibata pasti mereken penampat man bana ibas kesetiaanna ersembah.

Musuh-musuh Daniel makeken kekuasaan raja guna menjebak/nidingi Daniel. Ibahan me sada peraturen guna wajib ersembah man Raja dekahna 30 wari.Ise si la ndalankenca iukum itamaken ku gua singa (ayat 7-9). Raja Darius ngesahken peraturen e alu la ngukurken dampakna man Daniel.

Emaka Arah peraturen si isahken raja Darius, Daniel terdat ngelanggar aturen raja, emaka Daniel harus iukum, itamaken ku gua singa. Enda erbahanca turah perbeben ibas pusuh raja Darius, erkadiola ia enggo ngesahken peraturen e, sebab la isangkana Daniel si jadi korban peraturen e.

Refleksi.
* Kalak si tutus erkiniteken teridah arah ketutusenna ibas ndahiken dahinna. Bagi Daniel sekalak si tutus ndalanken tanggungjawabna ibas kerajaan Darius, enda ilakoken Daniel labo erkiteken hubungenna ras Darius tapi hubungenna ras Dibata arah toto ras ibadahna.
* Melala tantangen kalak si tutus ndalanken kebenaren ibas ndalanken tanggungjawabna. Ula tantangen e erbahanca surut ketutusenta ibas ndahiken dahinta, bahkan harus reh tutusna ndahiken dahin e.
* Ibas muat sada keputusen ras mereken pendapat, harus siukurken lebe alu mbages kerna dampak/akibat/ulih keputusenta e, kita harus ertimbang alu mbages, ula metersa muat kesimpulen arah megiken sada sisi/opini publik, ula kari turah penyesalen/perbeben bagi Raja Darius si erkadiola ibas keputusenna.
 
Pdt. Togu P. Munthe, M.Th
GBKP Cililitan
 

Pekan Doa Sedoni Wari V, Ogen I Tesalonia 1:6-10

Renungan

 
Tema :
Kukelengi gerejaku
 
 
Perpulungen sikelengi Tuhan,
Gereja eme persadaan kalak sitek man Tuhan Yesus. Erkiteken gereja ersada rasTuhanYesus maka gereja harus jadi usihen sebagai pribadi-pribadi kalak kristen ntahpe secara ras-ras. Jadi usihen adi gereja tetap bas kekelengen, bagi Tuhan Yesus ngkelengi doni enda. Arah tema renungen sekalenda iperhadapken kita ku bas pernyataan : ula sungkun “kai si ban gereja bangku, tapi kai kuban man gerejaku? ”Alu pengharapen gelah kalak sitek man Tuhan Yesus, tetap ngkelengi gereja.
 
1 Tesalonika1 : 6-8 “perpulungen /gereja singusih Tuhan jadi usihen “
Surat Paulus man perpulungen Tesalonika nuriken kerna kegeluhen kiniteken perpulungen e siteridah arah perbahanenna. Keteladanan Paulus sebagai perberita simeriah kuperpulungen Tesalonika, ras erkiteken perbahanen Tuhan man perpulungen e erbahanca, melala gia kiniseran erkiteken tek man Tuhan Yesus tapi tetap ngasup ngaloken berita simeriah alu meriah ukur. Keteladanan Paulus teridah arah sikap nggeluhna siersaksi kerna TuhanYesus aminpe melala kiniseran si man bentasen. Ibas 1 Tesalonika2 : 1- 15 iturikenna kerna kai sialami ras siidahikenna kutengah-tengah perpulungen Tesalonika, antara lain :

- Ope denga ndahi perpulungen Tesalonika, nggo leben isiksa, igombang-gombangi kalak Pilipi.
- Paulus ngerana labo gelahn gena ate manusia tapi gelah ngena ate Dibata.
- Paulus labo ersura-sura gelah ipujiken kalak
- Amin pe lit hak mindo, Paulus nggeluh erberita simeriah ras mereken dirina guna berita simeriah e. Teridah arah kelatihenna erberita simeriah bagepe kelatihenna erdahin suari ras berngi gelah ola jadi tanggungen perpulungen.
-Lagu langkah bujur dingen la salah.
Perpulungen epe ngusih perbahanen Paulus seh maka perpulungen e pe banci jadi usihen man kalak sitek siringan i Makedoni ras Akaya. Berita simeriah mbar labo saja kubelang-belang daerah Makedoni ras Akaya, tapi mbar kujapape.
 
1 Tesalonika1 : 9-10 “ perpulungen e jadi topik percakapen simehuli “
Paulus nuriken maka perbahanen perpulungen, jadi percakapene nterem jelma, ibas :

- Ngalo-ngalo ras asum reh ndahi perpulungen e.
- Nadingken sembah-sembahenndu guna ndahi Dibata jenari nembah man Dibata singgeluh dingen situhu-tuhu.
- Uga perpulungen e nimai kerehen Yesus Kristus sipeduakaliken surga nari, simulahi kita ibas ukumen sinandangi reh ibas Dibata nari.
Perpulungen sikelengi Tuhan,
Kukelengi gerejaku nina tema renungennta wari enda, kai dage siban man gerejanta ?
- Gereja banci min jadi percakapen “buah bibir“ simehuli. Turikenlah rusur kiniulin gerejanta ula situriken rusur kekurangenna, pala sibereken solusi ras nggit muat bagin pekenasa. Gereja ula mbuesa ngerana ngenca, ntah peerbahan keputusen-keputusen ras rapat-rapat simbue tapi kai siilakoken ibas perbahanen sinyata ibas erkiniteken ras kekelengen. Nina Eka Darma putra : “Perbuatan kasih itu lebih bermakna dari pada 1000 khotbah tentang kasih”.
- Gereja harus jadi usihen bas ketutusen erkiniteken man Tuhan Yesus. Adi keleng ateta gerejanta siberelah dirinta jadi perkakasna. Sebagai anggota jemaat sisetia ras tutus, ula jadi jemaat siterdaftar ngenca ntah paksa perlu maka reh. Jadilah kita sebagai “gereja yang berbuat untuk gereja “. Gereja yang bersekutu, bersaksi dan melayani.
- Mediate nandangi gereja ibas perbebenna. Bagi Paulus sitetap mpediateken perpulungen Tesalonika, gia arah surat ia ngerana, bage min gereja mediate min nandangi kecibal temannta sada kiniteken, bagepe nandangi perbeben gereja-gereja simegati ndatken hambatan ras tantangan. Selamat, kukelengi gerejaku, mari sikelengi gerejanta…..Tuhan Yesus simasu-masu. Amin
 
Pdt.Karvintaria br Ginting, STh
GBKP Rg.Klender
HP : 08126359640
 

Pekan Doa Sedoni Wari IV, Ogen Kolose 3:18-21

Renungan

Tema :
“Kelengi Jabundu”
 
 
Bukan titik menentukan tinta
Tapi tinta menentuken titik
Bukan cantik menentukan cinta
Tapi cinta menentukan cantik
 
Syair lagu Titiek Puspa :
Jatuh Cinta berjuta rasanya, Bila cinta sudah bersemi, Tali sepatu rasa supermi.
Kata “Cinta” (baca: “KASIH” , “KEKELENGEN”)
 
Kolose 3 : 18 – 4:6, encidahken prinsip-prinsip “nggeluh ibas kristus” si seharusna icidahken ibas kegeluhen sitep-tep wari.
Sikap nggeluh ibas Kristus labo saja itengah-tengah jabu tapi pe tuan ras budak ras secara keseluruhen ibas masyarakat.
Disamping sie pe Rasul Paulus ngidah maka “nggeluh ibas Kristus” = nggeluh ibas pertoton.
 
Teks-ta berngi sipe-empatken enda khusus ngerana ibas hubungen keluarga(Bapa, Nande ras Anak).
 
Pedah man Ndehara (ayat.18)
“O kam ndehara, patuhlah man perbulangenndu.........”
Ibas piga-piga nats, Kata “Patuh” (Bhs.Ind.Tunduk) ; ipake ibas hubungen antara atasen ras bawahen, penguasa ras sinikuasai, umpamana:
• Titus 2 : 9 : Budak ras Tuan
• Roma 13:1, 1 Petrus 2:13 : Pemerentah ras Rakyat
 
Tapi kata enda pe ipake ibas hubungen Perbulangen ras Ndehara (Efesus 5 : 22; Titus 2:5 ; 1 Petrus 3:1). Erkiteken sie maka megati ipersoalken, kaum feminisme menggugat alu dasar Emansipasi/Gender ras sidebanna.
 
Bdk.Liturgi Perjabun
Model 1 : Kam sidiberu; ikutken(Patuh) ----1 Pet 3 : 1-4-----
Model 2 : O kam perbulangen ras ndehara, sikeleng-kelengen kam ----.Bd.I Joh 4:7-----
 
Tapi kata “patuhlah man perbulangenndu” iikuti kata “bage me ibahanndu selaku kalak Kristen” (Bhs.Ind. seharusnya didalam Tuhan) = selaku pengikut Kristus/erkiteken tek kam Kristus patuhlah jadi dasar kepatuhen e eme Kristus.
 
Pedah man Perbulangen (ayat.19)
O kam Perbulangen, kelengilah ndeharandu....
Kata kelengi itambahi kata ola “kasar” = “kejam”: ertina ula mperbudak ia, ula ban ia desken pembantu.
 
Pedah man anak (ayat.20)
“0 kam anak-anak.......patuh man orang tuandu..”
Kata “Patuh” (Bhs.Ind. Taati) = Begiken kai ajaren orang tuandu., sabab bageme singena ate Tuhan.
 
Pedah man Orang tua (ayat.21)
“O kam orang tua, ula rusursa junguti nakndu, gelah ola bebe ukurna”
(Bhs. Ind. Kata “Orang tua”=Bapa-Bapa. Kata: “junguti”=”sakiti hati”, Kata”bene ukurna”=tawar hati)
“sakiti hati” = menggusarkan, membuat jengkel, membuat benci.
“tawar hati” = patah semangat, tertutup terhadap segala sesuatu. Sehingga takut dan tidak mau melakukan sesuatu.
 
Mulihi kubas kata Patuh ras Kekelengen ibas pengertin sideban;
Kata Patuh (Yunani HUPOTASO) = menempatkan diri dibawah
Kata Kelengilah ((Yunani AGAPAO) = Menyatakan kasih, memberi diri.
“menempatkan diri dibawah”sejajar “memberi diri”. Alu bage Perbulangen ras ndehara arus “saling memberi diri”.
Alu pengertin”memberi diri” tentu la hanya ibas hubungen perbulangen ras ndehara tapi pe itengah-tengah keluarga ras silebih luas tentuna itengah-tengah masyarakat.
“Saling memberi” ibas kata dasar “Patuh” ras “kelengen” enda banci ijabarken alu melala kata “Saling” eme :
 Saling Menerima
 Saling Menghargai
 Saling Mengutamakan
 Saling Memuji
 Saling Mangampuni
 Saling Membangun
 
Mungkin lit denga banci tambahi kata “Saling” sidebanna tapi ula tambahi kata “Saling-Saling” atau sisaling-salingen.
 
Ibas konteks Ertoto tentu sipaling penting “Saling notoken”. Perbulangen notoken ndeharar as anak-anak. Ndehara notoken Perbulangen ras anak-anak. Anak-anak notoken orang tua. Kerina notoken Gereja ras Masyarakat.
Adi bage la hanya :”DI DOA IBUKU NAMAKU DISEBUT” tapi “DIDOA AYAHKU, DI DOA ANAKKU, DI DOA GEREJAKU, DI DOA MASYARAKATKU NAMAKU DISEBUT”.

Pdt.Iswan Ginting Manik
HP. 0812-7020-9020
GBKP Pondok Gede
 

BP-KLASIS-XXX

"SELAMAT DATANG mengunjungi Web GBKP KLASIS JAKARTA-BANDUNG"

Renungan

  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15

Pengunjung Online

We have 138 guests online